Biancasblue bìnchidas in tres set dae Futura Giovani in su settimu turnu de s’A2 de sas feminas
Si faghent ancora isettare sos primos tres puntos fora ‘e domo pro s’Hermaea Olbia, chi rupit bìnchida in tres set su taraflex de Busto Arsizio, in su turnu de intro ‘e chida de su campionadu de A2 de sas feminas. Sa contra, animada meda, gratzias puru a sa balia de Zanette, at impedidu a sas àbbila de Taulara, de donare sa sighìda a sa proa manna de dominiga passada contr’a s’Albese, perdende sos tres partziales 25-15, 25-17 e 25-18.
SA GARA- Busto Arsizio mantennet su cumandu a incomintzu, cumandada dae su geniu de Zanette. Hermaea mantenet su passu, torrende donzi colpu insegus, pustis penat sa lestresa lombarda subra su 9-5 ( sinnant Member-Meneh).
Guadalupi preguntat su primu timeout, ma bidet sas suas dopiadas, gratzias a su muru de Botezat subra Schirò. Sas àbbilas mudant opposto fatende logu a Messaggi, ma sa media de su set abbarrat su matessi: sa Futura Giovani fuit fintzas a +10 (17-7) e profitende de un’Hermaea ìncostante, tancat su set cun autoridade (25-15), cun sa giogada de segunda de sa palleggiatrice Balboni.
Sas hermainas mustrant sinnos de metzoru in sos primos passos de su segundu set e guidant fintzas a su 7-6 , ( manu out de Schirò. Pustis però, sas meres de domo torrant a cumandare cun s’ajudu de Zanette, balantzende 4 puntos, chi oriolant Guadalupi (12-8 e Fontemaggi in campu). Sas biancasblue iscradiant ancora in segus, patende sos colpos de Zanettee e de s’americana Member-Meneh (20-13). Proant a si torrare a pesare a sa ritza, ma nudda potent contra sa balia de sa contra bustocca, ch’isponet 25-17, pustis de sa fast de Tonello.
In su terzu set s’Hermaea si mantenet accurtzu (-2 subra su 10-8), ma in sa fase de mesania de su set, pagat sas faddinas e ruet in segus de 5 puntos, consitzende gasì su timeout nou de mastru Guadalupi. In campu s’idet puru Diagne, Busto però no lassat logu a dubiu perunu, 18-9 cun ace de Badalamenti. S’ace de Tajè chi giompet a su -6 est solu illusione: sas biancasrujas in fatu mantenent frimmas sas briglias e aggabbant sa cuntesa subra su primu tempo de Tonello chi balet su 25-18 finale.
SU CUMMENTU – “No semus resessidos a abbarrare a su livellu issoro – narat mastru Guadalupi – Busto at mustradu pratichesa, at abbatigadu ‘ene e attacadu cun balia manna, ma nois no semus resessidos a nos parare cun su muru de defesa, Sa partida est tuccada subra binarios de favore pro sa contra, Cando semus ruttas amus sighidu cun sas faddinas chi nos ant impedidu su recuperu. Peccadu, isperaiamus de resessire a ponnere in pratica cantu proadu in allenamentu, invece devimus galu creschere. Si amus una contra complicada chi pagu logu lassat a sos àteros, tando tocat de donare respetu a cantu contivitzadu prima de sa gara, si nono devimus leare sas conseguentzias. Potimus impitare partidas comente cussas de oe, pro bene comprendere sa distanzia chi nos istejat dae iscuadras comente Busto Arsizio. Si cherimus ponnere mediu nos tocat de alciare su livellu de su giogu nostru”.
