Binchida in battor set pigada a pizu dae una gioghera pagu fatzile e meda bilantzada
E sunt duas! S’Hermaea sighit a binchere e pustis de su Club Italia, colat vintzente in su campu de sa neopromossa Offanengo.
Impitat battor set su sesteto de Guadalupi (26-28; 25-21; 19-25; 23-25 ), chi at apidu rejone de una contra aggherrida, pro resessire a isponnere una gara giogada semper accurtzu a sa punta de s’ecuilibriu.
Si sunt fatas a bidere luego, in domo biancablue, sas duas bandas Bulaich e Miilen ( 20 puntos sa prima e 17 sa segunda, pasados a terra).
Sa binchida permitit a sas abbilas de Taulara de abbarrare a su cumandu de su girone A de serie A2, paris cun Cremona, Busto Arsizio, Brescia e Lecco.
SA GARA
A s’incomintzu ambas iscuadras donant vida unu puntu a puntu chena mediu. S’Hermaea chircat e agatat sa metzus giogadas in sa mesania, ma est pagu pretzisa subra sa bàttida. Offanengo tando si mantenet accurtzu a sa coa de sas sardas e pustis che las colat, subra su 18-17, cund’unu muru vintzente in atacu, dae sa segunda linea de Bulaich. Guadalupi preguntat su primu timeout e a sa furriada in campu sas abbilas si pesant in bolu giompende a su 22-19, gratzias a unu paloneto de Schirò.
Custa olta est Bolzoni a chircare ‘e ponnere mediu e Offanengo furriat in partida torrende a apparinare subra su 23 gratzias a sa balia de Bertasaghi. Ma dae incue a pagu si torrat a su puntu a puntu, caminu chi gighet a balantzare: incue s’Hermaea mustrat pius isperiu cun sos cotzolos agatados dae Schirò e su muru de Bridi chi fissat su punteggiu de su primu set subra su 28-26.
Sa reatzione de Offanengo no si faghet isetare meda a incomintzu de su segundu set (luego 6-1). Guadalupi seberat tando de mudare sa diagonale, cun Bresciani e Messaggi in su logu de Bridi e Schirò, in debadas però e sas meres de domo bolant a +10 (14-4). In campu s’idet puru Fontemaggi in logu de Bulaich, tando est propriu sa bona proa in sa bàttida de s’ischiacciatrice ex Ravenna, chi permitit a s’Hermaea de furriare in giogu torrende a -5 (15-10).
Su sesteto de Bolzoni mantennet suta controllu sa contra sarda e balantzat 5 boccias set. Bulaich e cumpantzas remediant sas primas duas, ma nudda potent contra sa parallela de s’ex Trevisan, chi apparinat su contu (25-21).
Su terzu set sighit a pasare subra sa mesania, cu sas iscuadras chi apparinant a 14. Sas sardas tando agatant sa balia pro sa fua, gratzias a s’atacu in fast de Gannar (17-15) e su manos out de Schirò, chi faghet oriolare Bolzoni. Sa Chromavis suerat a mantennere su tempus de sa Hermaea, chi ajuada dae sa faddina de Pinali ponet manu a su set, binchidu cun balia 25-19, pustis de su diagonale vintzente de Miilen.
Timende de perdere sa partida, Offanengo tuccat lestra e detzisa in su cuartu set ( in lestresa giompet a 5-1 gratzias a sa faddina de Tajè).
Sas hermainas no s’impressionant pius de tantu, apparinant a 7 e profitant de sa faddina de Bartesaghi e si che colant cun Bulaich. S’argentina cun s’ajudu de Miilen guidant sas isolanas a +4 (17-13). Unu paju de frusciadas arbitrales dubias donant fastitzu a sas abbilotas, chi s’ident tentas subra su 18, passadu un atacu muradu de Schirò. Guadalupi faeddat cun s’iscuadra sua, chi remediat in lestresa, resessit a torrare a fuire, gratzias puru a sas giogadas balentes de Bulaich-Miilen. Tajè in fast si leat sa prima boccia set subra su 24-22, Offanengo annullat sa prima ma poi ruet suta su diagonale vintzente de Bulaich, chi donat a s’Hermaea sa segunda binchida de cust’annada (25-23).
“No est istada una gara de pagu contu, nois l’ischiamus – cummentat mastru Guadalupi – est cosa bona meda de potes torrare an’domo vintzentes, pustis de una gara chi nos at bidu penende in meda partes. A mamentos amus sueradu in sa retzida, contra un’Offanengo balente e ordinada. A incomintzu amus pensadu de nos misurare in sa lestresa, ma custu no fit donende bonos frutos. Bell’a bellu semus creschidos fatende pratichesa, su resultadu est sueradu e fato sos complimentos a sa contra. Nois Amus galu meda tribagliu ‘e faghere, ma sa gara de oe nos potet ajuare a comprendere cosas meda, subra totu comente cuncordare su giogu a su tipu de contra”.
