Abbilas de Taulara binchidoras a su tie break, tratzadas dae sos 28 puntos de Adriano
Meda caras mustrat sa gara còntra Melendugno, bìnchida dae s’Hermaea Olbia in sa settima die de s’annada. A ponnere a terra sa boccia c’at agabbadu totu, b’at pensadu Virginia Adriano, dereta dae sa linea de sos noe metros. Duos puntos chi permittint a s’iscuadra sarda de cumprire pro sa prima orta in su cuintu set, immentighende gasì sas perdidas còntra Mondovì e Lecco in su partziale finale. Pro cantu Melendugno, giogat pro sa prima orta cust’annu su cuintu set e torrat in Puglia cund’unu puntu in bertula, chi sinnat sa classifica sua. Su primu set, bene bilanciadu, toccat a Olbia mancàri esser’istada insègus subra su 16-20, resessit a binchere a sos vantaggi 32-30, pustis chi sas salentinas ant fratzadu ses boccias set. Ma sas piseddas de Napolitano si torrant a pesare luego a sa ritza, tantu chi Antignano e cumpantzas si gighent a domo su segundu e terzu partziale (25-21 e 25-19), cando sas sardas fratzant meda, pius de totu in su terzu set. Olbia però no est meda cuncòrda e dominiàt su cuartu set cun pag’oriolu dae incomintzu (11-5) pro si lu gighere a domo a sa fine subra su 25-18. Su tie break tuccat bene bilanciadu, Melendugno carignat s’idea de balantzare sa segunda bìnchida de s’annada, missione cumprida dae sas meres de domo, chi comente nadu a incomintzu, la cuntzànt gratzias a s’ace de Adriano, fattende iscasciare dae sa cuntentesa su GeoPalace.
Mastru Dino Guadalupi:”Oe puru amus bidu cant’est bilanciadu su campionadu nostru, Melendugno at mudadu feminas in campu e custu nos at fatu perdere carchi colpu in attacu, mancari semus istados semper atentos cun sa defesa. Colada sa binchida a incomintzu, amus patidu sa furriada de Melendugno. Sas piseddas, comente capitat, chircant su cabu personale cando no resessint a ponnere sa boccia a terra cun lestresa. Como sa cosa pius importante abbarrat su resultadu, ossiat su motore chi donat sa fortza pro sighire a tribagliare a cudda manera. Tzertu potimus metzorare e meda puru, devimus tribagliare subra sa chirca de bonas solutziònes, in totu su contivintzu de sa gara.
Mario Bua Capitta, Amistade
