Biancasblue binchidas in tres set dae sa neopromossa Cbl. No abbastant sos 17 puntos de Adriano
Abarrat galu chena vittòria s’Hermaea Olbia, binchida in tres set, subra su taraflex de sa Cbl Costa Volpino, in sa cuarta partida de sa serie A2 de sas feminas.
Un’àtera proa bantzigàda pro sas àbbilas de Taulara, coladas in unu primu set de bilànciu (25-20), e trampadas in su segundu guidadu innantis pro bona partede su tempus (25-22). Pag’istoria invece in su terzu set, binchidu dae Costa Volpino 25-15. No abbastant tando sos 17 puntos de Virginia Adriano, in domo bergamasca top scorer est’istada Ghezzi (15).
SA GARA – Tuccada lestra pro Costa Volpino, chi giompet luego a su 8-5. Hermaea torrat accurtzu cun duos puntos de Adriano, unu fatu a s’àteru, pustis bi pensat Boshnakova a guidare sa fuida de sas lombardas (17-13). Tando s’ex Ghezzi lampat a terra su 24-18, cun coragiu sas olbiesas agabbant duas boccias set, pustis si devent però arrendere a sa fast de Mazzoleni chi balet su 25-20.
Sa sestina de Guadalupi bogat balia a s’incomintzu de su segundu set colendesiche luego a su 5-1 ( attàccu vintzente de Orlandi). Sa CBL giogat pro no si lassare istejare meda e torrare a s’accurtziare, profitende de sas primas faddinas de sas sardas, e che colare innantis subra su 17-16, gratzias a una faddina de Adriano. Torrat tando sa balia de Schmit e cumpantzas, chi parent prontas a apparinare sos contos, cando sa lughe s’istudat un’àtera ‘ia, Costa Volpino profitat bene, pro giompere a su 2-0, gratzias a su puntu finale sinnadu dae Lancini.
Sas herminas gherrant puntu còntra puntu a incomintzu de su terzu set ( paris 8 cun sa sinnada de Anello). Pustis Cbl torrat detzisa innantis, gratizas a Lancini, Boshnakova e Mazzoleni (14-8). Tando Guadalupi donat logu in mesania a Marku e a Fontemaggi in banda, ma su cabu no mudat: Costa Volpino no si frimmat pius e si gighet a domo sa binchida 25-15, sinnada dae Mazzoleni.
“S’istima de sa proa oe est pagu bona – cummentat mastru Guadalupi – no resessimus a ponnere sos bicculos umpare. Amus incomintzadu su primu set cun una bàttida tropu lebia pro custa categoria. Sa còntra at semper giogadu a boccia in manu, ca ichiant de sa debilesa nostra in custu fundamentu. Amus fatu metzu àteras cosas e custu at permissu de abbarrare intro sa gara: in logu de sa chirca de s’atza ‘ona pariamus isettende sa faddina o su donu de sa contra. Cust’est sinnu de un’idea debile in custu mamentu. Su primu set no potet trampare sa gara intrea, ma tiat devere donare coragiu pro torrare su colpu. In contrariu in su segundu tempus amus donadu faddinas derettas e muradas. Sa bàttida est tando metzorada ma s’attaccu est abbarradu pagu nodidu. E pagu bene s’isterrida donada in su terzu set puru: in unu campionadu gasi bilanciadu donzi cosa accoglida est oro. Toccat de gherrare semper e incue semus unu pagu mancados, no est fatzile de comprendere pruite, ma tocat de faghere meda como pro metzorare. Sa proa at patidu su pesu mannu de mamentos malos. Male andat a comprendere ite nos est manchende e pruite impitamus su frenu a manu. Bi devo pensare ‘eo a agatare su cabu eretu. Devimus chircare sa perdida balia tot’umpare, pro poter immentigare custu mamentu de difficultade”.
Dana Schmit, palleggiatrice e capitana de s’Hermaea narat: “Semus colende unu mamentu de difficultade, tando giogamus pagu cumbinchidas e pagu seguras. Cando semus innanti no resessimus mai a tancare sa gara, como potimus solu tribagliare cun impignu mannu, pro metzus isperare in su tempus bennidore”.
