Sas biancasblue binchidas in tres set in su Centro Pavesi, contra su Club Italia: Esposito sa pius balente (20 puntos)
Serantina de immentigare pro s’Hermaea Olbia, binchida in tres set dae su Club Italia, in sa die de su Boxing Day de s’A2 de sa feminas (25-13, 27-25, 25-23 ). De cara b’aiat una contra ben’abbista in sa battidura, gratzias puru a una Esposito indemoniada (top scorer de sa gara cun 20 puntos), sas sardas no sunt resessidas a agattare unu bonu mediu, abbojende gasì sa sesta partida perdida de cust’annada.
SA GARA – Tuccat in pigada su primu set pro s’Hermaea, chi accusat sos colpos donados dae Esposito (6-2). Mastru Guadalupi preguntat su primu timeout e Bulaich proat a torrare cun su mani out, ma est solu unu fogu lenu. Acciarri murat Schirò pro s’8-3, Esposito torrat su cabu chena perdere tempus, cund’un’attacu dae sa segunda linea. Sas hermainas propriu no resessint a bintrare in sa lutta ‘e sa partida, tando sas azùrrinas, bogant àzza, gratzias puru a sa bona battidura e balantzant su doppiu (16-6). In campu Fontemaggi, Messaggi e Bresciani leant su logu de Miilen, Schirò e Bridi, ma nudda mudat. S’ace de Modesti sinnat su 19-8 e diffàtis agabbat su set prima ‘e s’ora, binchidu chena meda penare dae su Club Italia 25-13.
Su sesteto olbiesu tenet metzus sa gara in su segundu tempus, abbarrende umpare fintzas a sue 12. Su break de un’indemonida Esposito gighet su Club Italia a +3 (15-12). Su muru vintzente de Bridi apparinat totus a sue 16, pustis duas faddinas, una fatu a s’àtera de Esposito e Moretti,donant su logu a sa prima fuida isolana. Su mastru de sas feminas de domo Fanni, preguntat tando su primu timeout e sa gara furriat a su puntu contr’a puntu. Sas cosas parent torrende a su ‘èssu onu pro Hermaea, cando cumandat 22-19, sinnadu dae Gannar, ma Esposito paris cun Acciarri ajuant Club Italia a che colare innantis (24-23). Sa gara s’abberit tando a sos vantaggios, cun sas azùrrinas chi faghent su mediu pro l’agabbare (27-25).
In su terzu game su sesteto de mastru Fanni bi ponet pagu a fuiree doppiat luego sas sardas subra su 6-3. Olbia però no est pro nudda cumbinchida, Miilen in pipe giompet a s’11 paris, in fatu Bulaich agatat su logu ‘onu pro che torrare a colare sa contra. Su mamentu ‘onu de sas àbbilas de Taulara oriolat meda su Club Italia, chi prima apparinat e pustis si che torrat innantis cund’àteru servitziu vintzente de Esposito. Sa gara truvat innanti a proas de fùa, dae un’ala comente dae s’àtera. S’ace de Tajè balet su 22-19 pro s’Hermaea, mujada dae sa balia de Club Italia, capatza de frimmare sa fùa e torrare a cumandare fintzas a su 25-23 finale.
“Amus patidu dae incomintzu sa balia fisica de su Club Italia – narat a gara isposta Mastru Dino Guadalupi – sa contra sunt tuccadas bene meda in battidura, nois cando penamus in sa retzida, tando perdimus sa lumèra. Sa conseguentzia l’amus bida in su muru ‘e sa defesa, inue amus unu pagu faddidu e custu at ajuadu sa contra a fùire innantis. Nois nos semus semper accurtziados chena resessire a ponnere a frutu s’esperièntzia nostra, amus tancadu sos ocros pro nos atzumbare a su mur’issoro, ischende ‘ene cant’est forte. Semus istados pagu abbistos in sa gestiòne. Nos gighimus an’domo su ranchidùmine, amus meda tribagliu ‘e faghere pro imparare a metzorare s’intrepetu de sa gara”.
Traduzione di Mario Bua Capitta di Amistade
