Proa galana de sas olbiesas chi mancari chena Adriano, s’accurtziant a sa binchida prena contra sa LPM
Meda balia e paga sorte pro Hermaea Olbia, binchida in domo, a su tie break, dae Lpm Bam Mondovì in sa prima gara de sa serie A2 de sas Feminas.
Mancari pesuda siet istada sa mancantzia de s’opposto titolare Virginia Adriano, sas àbbilas de Taulara ant gherradu umpare, donende su sentidu in sa mesania de su cuartu set, de podere resessire a cumprire pro issas matessi, sa gara intrea.
In caminu però, sas monregalesas ant leadu sa guida gratzias a s’esperientzia de Decortes, MVP de sa gara cun 24 puntos postos in terra. In s’àter’oru no sunt abbastadas sas proas mannas de Imamura (20) e Gannar (13) in mesu a totu sas àteras.
SA GARA – Chena Adriano s’Hermaea est tuccada cun Orlandi in diagonale, Schmit, Imamura e Fontemaggi in logu 4, Gannar e Anello in sa mesania, Blasi libero. Mondovì at presentadu s’ex Allasia in diagonale, cun Decortes, Grigiolo e Lux in banda, Pizzolato e Riparbelli in sa mesania, cun Telloni libero.
Sas sardas ant carradu a domo su primu set, subra su 25-23, profitende cinicamènte de totu sas faddinas fatas dae s’iscuadra monregalese, chi est ruta a sa fine de unu puntu contr’a puntu chena làcanas, cun sas biancasblue semper in cumandu de su giogu.
In su segundu set sas puminas ant bogadu atza e autoridade torrende a guidare dae luègo (Lux sinnat su 21-13). Sas àbbilas ant proadu tando a accurtziare sa distanzia cun Fontemaggi, ma l’ant devidu bogare ‘e cabu cando su pallonetto de Decortes at apparinadu su contu (25-19).
In su cuartu game, retzidu su colpu, sas meres de domo ant torradu a cumandare su giogu, guidende cun balia noa, gratzias puru a sa bona vena in attacu de Imamura e Fontemaggi (25-18). Su sesteto de domo est parfidu tando in cumandu ‘e gara in su cuartu tempus, cando at ischidu ammuntonare tre puntos de vantàgiu (13-10). Bellu a bellu però, s’inertzia est torrada in manos rujasblue, chi che sun coladas innanti gratzias a Decortes, pro resessire a sa fine a tancare su giogu 25-17. Pagh’istoria in su tie break, cando sas piemontesas ant agabbadu sa gara profitende de su pesu de s’istrachesa.
“In su cuartu set amus sentidu de podère tancare sa gara e ponnere sos tres puntos in bertula”, at nadu mastru Guadalupi, “fimus gioghende comente si devet e s’inertzia pariat sa nostra. In fatu nos semus perdidos cando Mondovì at impitadu s’esperientzia in attacu, oriolende sa segunda linea nostra. Ischimus de sa gioventùde nostra e de un’assestu galu in emergentzia. Pensende a totu custu, su puntu balantzadu contr’a un’iscuadra de valore mannu, nos donat bon’isperu pro su tempus bennidore”.
Mario Bua Capitta, Amistade
