Vittoria nòdida pro s’Hermaea Olbia, chi donat sighìdu a su blitz de Pescara e che colat Nuvolì AltaFratte Padova in tres set, in sa cuarta gara de s’andata de sa Poule Salvezza (25-18, 25-17, 25-18 sos partziales).
Gratzias a custa binchida sas olbiesas s’curtziant a su cuintu logu -1, impignadu dae Melendugno (s’ultimu bonu pro mantennere sa categoria).
MVP Bianca Orlandi, sa metzus in campu, cun 20 puntos a terra. Ma mastru Guadalupi at agatadu balia in totu sas feminas impignadas: dae Partenio a Gannar paris cun Fontemaggi.
SA GARA – Mastru Guadalupi presentat Orlandi in diagonale cun Schmit, Fontemaggi e Partenio in su logu 4, Gannar e Marku in mesania cun Blasi libero. Padova torrat cun Bortolot a su palleggiu, Cicolini opposta, Rizzo e Trampus in banda, Volpin e Fanelli in mesania cun Masiero libero.
S’Hermaea tuccat de bona lèna e fùit luego a +5 (9-4). S’AltaFratte S’accurtziat fintzs a su -1 (13-12), ma leant luego nòdidu cumandu gratzias a su diagonale de Orlandi (18-13) e cuntzant sos contos cun su 25-18 postu a terra dae Partenio.
Abbarrat su cumandu sinnadu biancublue, puru in su segundu partziale, con sas meres de domo chi doppiant luego sa còntra subra su 12-6 e non si girant piu pro abbaidare in-segus, fintzas a giompere a su 2-0 in contu, gratzias a su paloneto de Fontemaggi (25-17).
Pius gherradu su terzu set: sas àbbilas de Taulara fùint a +4, ma Padova torrat in gara e apparinat a 8. Cando torrat s’atza de sa còntra, Schmit e cumpantzas no si lassant mujare e mantennent sa balia issoro:su muru de Partenio furriat sa gara in manos biancasblue, chi current in falada fintzas a sa fine, giompende a su massimu resultadu, 25-18.
Mastru Dino Guadalupi:”s’iscuadra at fatu totu ‘ene, su chi impitaiamus pro cumprire sos contos. Sa balia de sa còntra fit minore a cantu pensadu intro ‘e chida. Meritu nostru puru, ma sa proa nostra potet galu metzorare. Devimus bidere totu umpare sas faddinas de oe pro ischire cantu potimus pigare de livellu in tempus bennidore. In sos primos duos set semus colados chena pasu, in su terzu Padova at proadu a torrare in gara creschende su tempu issoro in sa chirca de poddare s’attacu nostru. Pustis de su timeout, nois puru amus avelguadu su tempu nostru pro leare in manu sa gara ”.
Mario Bua
Associazione Amistade
