Sa resa bàntzigallera costat cara meda a sas biancasblue, binchidas in domo in tres set dae s’iscuadra lombarda
S’Hermaea Olbia est galu attesu dae giompere a sa prima vittòria in su campionadu ‘e och’annu. Espugnadu est istadu su Geopalace dae CremonaUfficio Esperia in tre set (25-23, 25-20, 25-22) gratazias a sa balia comuna de s’iscuadra. Sas biancasblue traidas dae su sighidu bantzigallare de su rendimentu.
Cremona vintzente gratzias a sos 14 puntos de Taborelli, e sos 12 de Rossini e Piovesan. A sa contra no sunt abbastados sos 14 puntos de Adriano.
SA GARA – S’Hermaea falat in campu cun Adriano opposta a Schmit, Imamura e Orlandi in logu 4 Gannar cun Anello in sa mesania e Blasi libero. Sa Cremonese torrat cabu cun Turlà a su pallegiu, Taborelli opposta, Rossini e Piovesan in banda, Munarini e Ferrarini in sa mesania, cun Gamba libero.
Isposta sa proa de fùa de s’Hermaea subra su 5-2, sas lombardas apparinant e truvant dae puntu a puntu, fintzas a cando si che colant innantis 21-18 gratzias a una giamada arbitrale chi lassat sas meres de domo attediadas. Hermaea paret pronta a sa resa, ma sa balia de Fontemaggi torrat a apparinare sa sorte a sue 23. A sa fine però, prima Rossini e pustis Piovesan ajuant s’Esperia a si leare su set, (25-23).
Sas àbbilas de Taulara bogant tando tota s’atza connotta e in su segundu set fuint luego 8-2. Mastru Zanelli seberat tando de mudare diagonale, cun s’intrada de Balconati e Felappi. Ambas donant animu nou a s’scuadra issoro, chi achivit sa remuntada, gratzias a una proa galana de Rossini in sa bàttida sua.
Su primu tempus de Ferrarini sinnat sa colada innantis de sas istrantzas (9-8), chi agguantant bene sa furriada de sas sardas (15-15) e balantzant gasì puru su segundu set, sinnadu torra dae s’opposto Taborelli.
Pagu mudat sa caminera de su terzu set, cando s’Hermaea si faghet a bidere bene in sa tuccada e pustis si lassat sighire dae sa contra, chi apparinant a 12, prima de torrare a leare su cumandu e achivire sa binchida tota intrea, subra su 25-22, semper sinnadu dae Taborelli.
“Aimus potidu faghere metzus – cummentat sa libero biancablue Sophie Blasi – ma cust’est unu campionadu de livellu altu meda, inue mai ischimus comente potet andare. S’iscuadra at fatu a bidere metzoru, dae sa partida de dominga colada in Marignano. Issas ant ischidu profitare de sos mamentos de importu mannude sa gara. Martis chi benit torramus in palestra, in sa chirca de su metzoru de impitadu in sas garas che bennint. In tempus de preparatzione a su campionadu amus giogadu pagu, ma cussa no cheret essere un’iscuja. Dae inoghe tuccamus solu pro metzorare”.
Mario Bua Capitta, Amistade
