Nudda ‘e ite faghere pro sas sardas contra sa Bsc Materials: aggabbada 3-0 sa partida (25-17, 25-16, 25-22 sos partziales)
Nudda’e ite faghere pro s’Hermaea, chi in su campu de Sassuolo ruet in sa segunda perdida, una fatu a s’àtera, de su campionadu de A2 de sas feminas.
Tres set a zero: cus’est su contu de sos puntos chi donat sa binchida a sas meres de domo, chi ant ischidu cojuare un’attacu balente una defesa briosa. Semper fatu, chena pasu s’Hermaea, accudidat in Emilia galu chena sa pallegiatrice Ulrike Bridi.
SA GARA
A incomintzu Hermaea furriat donzi corpu contr’a sas meres de domo. Sa gara caminat punt’a puntu fintza a sue 12, pustis Sassuolo proat a fuire 15-11 ( muru vintzente de Civitico), Guadalupi preguntat gasì su primu timeout. Sas olbiesas bi ponent pagu a leare animu e s’accurtziant a -1 cun Bulaich (16-15). Custa orta est duncas Venco a ponnere remediu, su mastru de sas meres de domo e sas feminas suas donant su cabu isettadu (20-15 a su paloneto de Pomili). Sassuolo defendet cun balia manna e no si girat pius a abbaidare insegus: Pistolesi a fortza de servitzios avvelenados tancat totu subra su 25-17 e si gighet an’domo su primu set.
Sas emilianas defendent tando cun animu beru a sa tuccada de su segundu set e no lassant mai ruere sa boccia a terra. Su remediu sighidu ajuat sas sassolesas a fuire luego attesu 14-6. S’Hermaea comintzat a perdere animu e abbaidat chena remediu sa fuida de sa contra (20-13 cun s’ace de Manfredini, classe 2006). Guadalupi faeddat cun sas giogadoras suas, ponnet Messagi in logu de Schirò, ma non resessit a moderare su cumandu de su giogu de Sassuolo (25-16 cun s’urtimu puntu postu in terra dae Civitico).
Sas àbbilotas torrant in giogu a incomintzu de su tertzu set, cu su metzoru in sa battidura balantzant +5 (11-6 pustis unu diagonale out de Pomili).
Venco impitat ateros duos timeout unu fatu a s’ateru e sas piseddas li torrant bonu cabu. Hermaea mantenet su cumandu de su set 16-12 gratzias a su mani out de schirò, ma pustis devet ponnere in contu sa furriada de Sassuolo chi cun su tribagliu mannu de Pistolesi apparinant prima e da poi che colant sas olbiesas 17-16. Guadalupi bi torrat a proare a donare animu a sas suas, chi sufrint su primu tempus de Civitico, si retzen a sa ritza gratzias a su muru de Gannar (22-21).Pistolesi però no at dolu perunu e guidat sa fuida finale. Sa gara isponet cun sa faddina in sa battidura de Bresciani, chi printat sos contos subra su 25-22 e donat a Sassuolo sa binchida intrea.
“Custa orta sa tuccada est’istada bona meda – narat mastru Dino Guadalupi – amus chircadu luego brios e balia, comente sa contra matessi. Fintzas a sa mesania de su primu set semus resessidos a giogare paris cun issos, pustis semus ruttos in meda faddinas chi nos ant fatu perdere unidade. Perdidu su primu break, no semus resessidos a ponnere remediu, devimus tribagliare subra custu ca est faddina già ida in tempus passadu, a incomintzu de set. Custu fatu nos at tribuladu a incomintzu de su segundu set puru, cando amus perdidu geniu contr’a su servitziu de Sassuolo. Tando amus fatu puru cosas bonas, tropu pagu però pro su chi impitaiamus pro luttare contr’a sa fortza de su giogu issoro.In su terzu set s’est bidu su metzoru nostru, mantentzende pro tempus meda su puntu a puntu. A sa fine amus arriscadu tropu, lassende su logu a sa contra pro contivitzare sa binchida. Sas cosas bonas? de seguru sa tuccada e su terzu set – sighit – devimus chircare sa matessi balia in allenamentu e devimus bene cumpredere inue potimus arriscare e inue nono in sos mamentos divessos de sa partida“.
