Sighit gasì su caminu netu de sas olbiesas, chi che colant a su tie break s’Itas e pro una note si leant su cumandu solitariu de sa classifica
De no crere, sa remuntàda de s’Hermaea, pustis de duos set perdidos malamènte, resuscitat e che colat in su campu de su Geopalace, s’Itas Trentino, in sa terza giogada de su campionadu de serie A2.
Sighit gasì, duncas, s’imbinchibilidade de sas àbbilas de Taulara, chi si donant sue tres, fatu a cussas contra Club Italia e Offanengo. Sa binchida pesuda e diciosa, benit printada dae s’assotziu intreu: sas allutas de Bulaich e Miilen (ambas 20 puntos), fintzas a sas feminas in panchina (Fontemaggi, Bresciani e Messaggi), prontas a rupire in sos mamentos pius diffitziles de sa gara.
Cun sos duos puntos balantzados, s’Hermaea che pigat a cuota 8 in classifica e a su nessi pro una note, s’appasigat sola in sa punta de sa classifica.
SA GARA
Sas olbiesas tuccant cun Bridi in regia, Schirò opposta, Bulaich e Miilen in banda, Tajè e Gannar in sa mesania, Barbagallo libero.
Trento ponet Bonelli in diagonale, cun Dehoog, Michieletto e Mason in banda, Moretto e Fondriest in sa mesania, Parangeli libero.
S’incomintzu paret unu bisu malu pro s’Hermaea chi patit sa lestresa manna de su giogu de su sestetto de Saja e iscradiat insegus fintzas a ruere 11-2. Guadalupi seberat tando su cambiu de diagonale ( bintrant Messaggi e Bresciani in logu de Schirò e Bridi), ma no resessint a minettare su cumandu de s’Itas,chi balantzat chena penare meda su primu set 25-11.
Su segundu game sighit sa moda de su primu: Trento fuit luego in lestresa ( 14-5 cu s’americana Dehoog chi faghet sa ‘oghe russa) e s’Hermaea impitat puru Fontemaggi in logu de Miilen e penat, ma pustis, gratzias puru a una bona torrada in sa battìda de Messaggi, leat animu e custringhet Sajaa preguntare su primu timeout de sa gara, furriende a -4. A sa torrada in campu sas istrantzas non lassant pius mediu perunu a sasa sardas e bolant subra su 2-0 in contu, meritu a sa ballia de Michieletto puru (25-17).
Sa cappa paret male sestada pro sas àbbilas a incomintzu de su terzu set, cun s’Itas chi colat a +6 ( 10-4 cun lungolinea vintzente de Mason). Tancadas in curtzu, tando sas sardas torrant a agatare sa perdida fidùcia e incomintzant a giogare cun atera balia: Miilen tucat a innanti, Bridi printat s’apparinada e Gannar ponet a terra sa prima fua, cund’unu muru vintzente (18-17). S’Hermaea bolat e giompet a +3, gratzias a unu diagonale de Bulaich.
Michieletto apparinat a 21 e pustis si giogat subra s’ecuilibriu: sa lutta est manna pro colare innanti, a sa fine che colat Hermaea cund’unu primu tempus printadu dae Ganner, chi giompet su 29-27.
Mudat su tempus de su match: sas olbiesas giogant cun animu nou e cumbinchidu in su cuartu set puru (13-10 cun muru de Bridi subra Michieletto).
Su balanzu creschet fintzas a +4, pustis Trento torrat in gara, comente semper cun Michieletto e donat vida a unu puntu a puntu chena lacanas, inue Trento agabbat pius de una boccia match, s’Hermaea resistit cun balia e – subra su 30-28 – resessit a giompere a su giuditziu de su tie break.
Su cuintu set finale paret in boza de allumare s’isperu de sas sardas, chi che colant innanti prima 4-1 e pustis subra s’11-5.
Dehoog e cumpantzas cherent fuire dae un’atera trampa, binchere sa prima in su campionadu issoro, tando accoglint tota s’energia abbarrada e mintzidiant sas herminas giompende fintzas a -1 cund’una parallela de Mason. Sa boccia si faghet pesuda meda, ma s’Hermaea agatat su geniu ‘onu: Miilen balanzat sa boccia match e abberit sa festa pro una binchida de importu mannu.
“Custas garas ajuant a creschere –narat mastru Guadalupi –Trento aiat tempus e puntas divessas dae cussas connottas. A incomintzu faddiamus sas giogada in sa chirca de su tempus issoro, ma custas sunt faddinas chi dipendent dae s’esperientzia. Semus torrados a tuccare in sa chirca de ite non andaiat bene, bellu a bellu amus accontzadu barriu e semus furriados in sa partida. In su terzu set aiamus bellu che perdidu, custu nos imparat chi sa partita no est mai isposta, fintzas a cando no ruet s’ultima boccia. Sa fiducia benit cando si giogat pro s’iscuadra – sighit a narrere – b’at semper mamentos diffitziles contra a iscuadras gasì de cussu livellu. Oe semus resessidos a remediare gratzias a s’ajudu de sa panchina: amus binchidu totu umparee mi complimento cun sas piseddas. Custos 8 puntos cherent narrere meda pro a nois, ca dae como innanti amus pius pagu tempus pro nos allenare, ca b’at partidas meda intro ‘e chida e fora ‘e domo,ma amus a chircare su metzoru gioghende. Nos isettant tempos tostos, nois l’ischimus, chircamus de l’impitare cantu metzus potimus e amus a bidere comente semus a sa fine de Santandria”.
