Una rètzida tribulada e una còntra balente, cundennant sas olbiesas a sa segunda perdida in s’annada noa
S’Hermaea torrat a Olbia chèna puntos dae San Giovanni in Marignano. In sa segunda gara de su girone B de s’A2 de sas Feminas, sas àbbilas de Taulara perdent 3 set a 0, subra su taraflex de s’Omag-mt (25-9, 25-16, 25-22 sunt sos tres partziales).
In terra romagnola sas àbbilas de Taulara, orioladas in sa retzida, no ant agatadu sa balia bogada in foras Dominiga passada contr’a Lpm Bam Mondovi, donendeli gasì su premiu intreu. De salvare sa balia bogada in foras a sa fine ‘e sa furriada in campu de s’opposto Virginia Adriano (12 puntos).
SA GARA – Torrat Adriano cun sas hermainas chi tuccant bene (2-0) donende bon’isperu a s’incomintzu. Luego però s’istudat sa lughe: s’Omag ponet a terra tres puntos, unu fat’a s’ateru e faghet a fuidùra 9-5.
Sa sestina olbiesa incomintzat tando a penare in sa retzida e no resessit pius a torrare su colpu comente si toccat, a Ortolani e cumpantzasa, chi binchent fatzile su primu set 25-9.
A incomintzu de su segundu set Schmit e cumpantzas abarrant in gara fintzas a su 4-3, pustis San Giovanni torrat lestru a fuire, gratzias a s’attacu vintzente de Turco e Saguatti. Orlandi proat a sestare su carru giompende a -5 (15-10), tando sas meres de domo li bogant de cabu, agabbende su segundu partziale 25-16.
In su terzu set s’Hermaea proat a agguantare subra su 12-10, gratzias a s’ataccu vintzente de Adriano, ma sa còntra torrat luego a cumandare su giogu (19-11 gratzias a sa faddina in sa retzida de Blasie e sa gara paret gasì tancada. Sas olbiesas no sunt galu cumbinchidas , bogant a pizu sa balia connotta e torrant a s’accurtziare subra su 22-20. A sa fine però est semper s’Omag-mt, chi cun Saguatti sinnat su 25-22, agabbende sa gara in totu.
SU CUMMENTU – Su primu e su segundu set sunt istados mudados dae sa mala die de sa retzida nostra – narat Mastru Guadalupi – meritu mannu de San Giovanni in Marignano, chi cun battida galana c’at brincadu su sestàdu nostru, puru ca custu no est su livellu chi devimus donare a sa prima toccada. Chena resessire a sestare ‘ene s’attacu nos semus perdidos cun sa conca puru. Ischiamus chi nos toccaiat su cunfrontu cun un’iscuadra de esperièntzia manna, c’at bene profitadu de donzi faddina nostra. Sinnu bonu est bennidu dae sa torrada in campu de s’opposto Adriano chi devet galu metzorare sa balia atletica, ma at semper donadu bona proa. Salvamus puru sa furriada in giogu capitada in su terzu set. Como torramus a domo ischende chi su caminu de faghere no est pagu, si cherimus cumpetere cun iscuadras comente custa. Intro ‘e chida amus a tribagliare meda abberu pro metzorare conca, ischire tecnicu e fisicu”.
Mario Bua Capitta, Amistade
