Cuarta binchida de s’annada pro sas sardas, chi boltulant in tres set s’iscuadra lombarda
Hermaea Olbia torrat in su fortalesa de su Geopalace e agatat sa cuarta binchida de cust’annada, in su campionadu de sas feminas, volley a2. Binchida nodida pro su sesteto sardu, chi che colat in tres set sa Tecnoteam Albese Como (25-22, 25-23, 25-18 sos partziales) e che pigat a su cuartu logu de sa classifica, cun 11 puntos in contu. Top scorer sa giòvana pisedda Gannar cun 15 puntos, ma Guadalupi ( galu chena sa palleggio titolada Bresciani) at àpidu bonos cabos fintzas dae Bulaich e Miilen.
SA GARA
Sas àbbilas de Taulara tuccant cun su passu giustu, sighint bene totu sos rudìmentos e fuint luègo innanti 14-5, cun Miilen sa pius balente,
Su mastru istrantzu seberat su dopiu cambiu e bell’a bellu àgat sos cabos chircados dae sas suas, capatzes de giompere fintzas a -1 (22-21). S’abolotu finale però donat cuntentesa a sas biancasblue, chi binchent su contu, gratzias a su pallonetto in pipe de Bulaich pro su 25-22.
In su segundu tempus accudit sa reatzione de sas comascas, chi fuint luègo subra su +4 e sighint a guidare. S’Hermaea perdet in sa retzida e in sas partesas de attacu, ma in caminu resessit a che colare sa contra in su puntu a puntu finale cund’unu muru vintzente de Gannar (25-23).
Sas olbiesas che torrant a pigare a subra in su terzu set, guidadu dae sas primas battiduras (luègo 9-7, pustis 15-11) e aggabbadu chena bi pensare meda subra su 25-18, profitende de su calu de balia ‘e sa contra. Festa manna cando accudit su frusciu finale, ca ponent in contu un’àtera binchida de tres puntos e mantenent su passu de sas primas de su girone.
SU CUMMENTU – Semus meda contentos de custos tres puntos – narat mastru Dino Guadalupi- pustis sas proas de Cremona e Sassuolo, amus bidu un’iscuadra meda presente, capatze de bogare a pizu una proa de importu mannu, tribagliende a su chi amus bidu intro ‘e chida. Sa tuccada est istada bona meda, animada dae bona balia. Pustis, cando est creschida sa fase a muru de sa defesa de Albese, nos semus atzigu disunidos fintzas a nos complicare sa vida, a sa fine semus galu resessidos a giompere a sa pratichesa e nos amus balantzadu su set. In su segundu set nos semus apparinados, duncas in s’urtimu amus dominadu, fatende a bidere chi cheriamus aggabbare sa chistione. S’iscuadra est istada semper presente e at cumpresu ‘ene sa contra, gratzias puru a sos cambiamentos preguntados. Amus metzoradu meda in sa tatica e in s’animu. Custos puntos nos donant fidùcia pro sa chirca de sa creschida. Sos tres puntos donant puru animu pensende a s’impignu de duas bessidas chi nos isetant, cun Busto Arsizio e Brescia”.
Mario Bua Capitta, Amistade
