Una perdida tancat su caminu de s’Hermaea de s’annada ‘e cust’annu in sa serie A2 Tigota, de sas feminas. S’iscuadra de Guadalupi lassat sa binchida in manos de sa cabulista Cbf Balducci Hr Macerata (tres set a unu, partziales: 25-23, 23-25, 15-25, 16-25) , pustis de una gara bene giogada, subra totu a incomintzu. In debadas sos 19 puntos de Virginia Adriano, sa contra sinnat cun Stroppa (22 puntos) e sa mediana Civitico (15).
SA GARA – S’Hermaea presentat Adriano in diagonale, cun Schmit, Orlandi e Partenio in banda, Gannare Marku in sa mesania, cun Blasi libero. Macerata torrat cabu cun sa diagonale Bonelli-Stroppa, Mazzon e Civitico in sa mesania, Fiesoli e Vittorini in logu 4 e Bresciani libero. S’iscuadra biancablue incomintzant sa gara sena timire, donende vida a unu puntu a puntu sena làcanas, aggabadu cun s’ace de Adriano, impitadu pro sa fùa a 21-19. Sas istrantzas gherrant ma si devent arrendere subra su 25-23 ( attacu de Stropa muradu dae Marku). Olbia tuccat bene in su segundu set (luego 5-3), pustis torrant sas marchigianas, chi leant su cumandu gratzias a su servitziu vintzente de Bonelli (19-14). Hermaea paret accantu a ruere ma agatat sa balia pro si torrare a pesare a sa ritza e aberrere una janna noa a sa gara (ace de Fontemaggi pro su -1, 24-23), tando sa fast de Mazzon apparinat sos contos (25-23). Sos duos set in-fatu sunt cumandados dae su sesteto de Carancini, chi in su terzu set tuccat dae su 5-1 e àttit a su 25-15, sinnadu dae Vittorini cun autoridàde. Caminu sighidu in su cuartu giogu, tancadu dae Stroppa subra su 25-16.
Mastru Dino Guadalupi: “Amus giogadu unu primu set galanu. Totu torraiat in campu a sa perfessiòne, gratzias a s’atza manna nostra. In su segundu amus bidu pagu metzoru, tando Macerata at bogadu a pizu sa balentia sua connotta. Sa tribulia a resessire a ponnere sa bòcia a terra nos at ischidadu sos primos dùbios. Tando pariamus creschende, ma no semus achividos a ponnere in campu s’atza impitada dae ‘onzi fundamèntu. In su terzu e cuartu set est rùtu male s’ischire tecnicu. Amus sueradu in su muru de defesa e tando pagu m’est agradada sa mancantzia de atza in s’ànimu nostru”.
Mario Bua Capitta, Amistade
